O Goberno do PP e os tránsfugas non paga as subvencións prometidas, pero cobra as adicacións, plenos, comisións e demais prevendas….

O Concello de Gondomar ten sen pagar as subvencións do ano 2009.  Mediado o 2010 os Centros Culturais, Asociacións, Entidades deportivas e ANPAS seguen sen recibir as cantidades correspondentes ó pasado ano. Todas as xestións realizadas polas directivas dos diferentes colectivos só reciben unha e outra vez a promesa de que se lle van facer efectivas en cuestión de días, e estes seguen pasando sen que se faga o pago das mesmas.

Dende o PSOE queremos denunciar esta situación pola urxencia que teñen estas entidades sen afán de lucro de facer fronte ós pagos das actividades que realizan de forma permanente durante o ano, con débedas comprometidos que non poden satisfacer ó non recibir as cantidades prometidas polo Concello. Todo isto sen ter en conta que, segundo informacións non desmentidas polo goberno municipal, as cantidades solicitadas poden reducirse de forma moi significativa, o que vai implicar un endebedamento importante para as distintas asociacións que contaban con ese diñeiro para realizar pagos pendentes.

Esta situación contrasta coa alegría con que se asignan graciablemente salarios a determinados concelleiros polo simple mérito de romper gobernos e de impulsar novas maiorías que non saíron das eleccións e da vontade popular. Non se trata de limosnas que xentilmente outorga o goberno do PP-tránsfugas, senon de partidas económicas previstas para tal fin e con reflexo nos orzamentos que tan apresuradamente elaborou, presentou e aprobou o goberno local. Todas elas teñen a súa súa consignación económica polo que cartos debe e ten que haber. De non ser así, dende o PSOE esiximos e esixiremos as responsabilidades que correspondan pola ineficaz xestión económica dun goberno, que debe estar para gobernar con dilixencia, e non soamente para cobrar as adicacións que se adxudicaron.

O PSOE de Gondomar pide ó goberno municipal que faga con urxencia o aboamento das subvencións do ano 2009 e dos convenios coas ANPAS e demais entidades, así como que non rebaixe as subvencións para o ano 2010 máis alá da porcentaxe de rebaixa xeral que corresponda pola situación económica que estamos a vivir.

O PSOE de Gondomar presenta alegacións e propón melloras ao Plan de Ordenación do Litoral da Xunta e a súa incidenza no noso Concello.

Lonxe de liortas, polémicas e da simple denuncia mediática, segundo a nosa idea de recuperar o debate político e que en Gondomar se volva a falar de política, o PSOE ven de presentar por rexistro 31 folios de alegacións e melloras ao Plan de Ordenación do Litoral (POL) elaborado polo goberno do PP da Xunta de Galicia, cuxo proxecto foi remitido ao noso concello. Esta tarefa choca coa actitude sumisa, pasiva e ausente do goberno tripartito de Gondomar, PP-Move-tránsfugas, incapaz de facerlle fronte aos seus superiores da Xunta de Galicia na defensa dos intereses xerais das nosas veciñas e veciños.

Pondo de relieve o inmenso valor que o litoral ten para o noso concello e a necesidade de establecer un marco normativo que regule o seu aproveitamento dende unha óptica do desenrolo sostible e racional, pretendemos dende o PSOE de Gondomar mellorar o plan presentado respecto das especificidades e necesidades do noso municipio, aspirando por unha banda a un mellor modelo territorial, e por outra a dotalo das medidas de xestión necesarias para poder desenrolalo de manera máis efectiva, de xeito que o POL non se quede nunha mera declaración de obxectivos.

Así en xeral detectamos aspectos mellorables do POL en puntos básicos como son as dificultades de interpretación do territorio e da definición gráfica do plan, eivas na colaboración entre administracións e axentes sociais, falta a aprobación dunhas Directrices de Ordenación do Territorio con carácter previo ao presente Plan, carencias normativas, disconformidade co modelo territorial proposto coa creación dunha figura fracasada como é a da protección de corredor ecolóxico, a falta dun adecuado estudio das repercusións económicas do plan, incoherencias nas proteccións sobre solo urbano consolidado e solo de núcleo rural, melloras en fomento das plantacións forestais con especies autóctonas e da recuperación de zonas inundables e das actuacións públicas nos primeiros 500 metros dende a costa e necesidade de medidas específicas de protección na Rede Natura 2000.

E en particular, referidos ao noso concello, detéctanse unha serie de cuestións que se deberían correxir para adaptar axeitadamente o plan ás necesidades do noso municipio:

• Incoherencias na delimitación do ámbito do POL, considerando que o noso municipio non foi correctamente delimitado na área de aplicación do POL, pois se inclúen terreos que pola súa distancia e pola súa posición topográfica e visual respecto da costa non teñen unha influencia sobre a mesma que faga necesario incluílos dentro do ámbito do Plan.  O novo planeamento xeral do noso concello se está a tramitar conforme aos procedementos e determinacións da lei 9/2002, modificada polas lei 15/2004 e 2/2010 de ordenación urbanística de Galicia, e conforme ao procedemento de avaliación ambiental estratéxica definido nas leis estatal 9/2006 e autonómica 6/2007. Polo tanto existe unha garantía legal e funcional de que continuando co desenvolvemento deste plan, non se van a producir afeccións importantes ou non correxidas sobre o territorio.

• Delimitación de corredores ecolóxicos, delimitándose dun xeito certamente aleatorio varios dos corredores ecolóxicos que nos afectan e que non reúnen as características definidas no POL como tales.

• Cromatismo de núcleos de edificación, que está en moitos casos mal representado. O POL establece varios tipos de núcleos (tradicionais, de recente formación, …) e para cada un deles se lles asigna unha cor das súas edificacións. É importante que esas cores estean ben asignadas, pois son fundamentais para a aplicación do modelo de crecemento proposto no POL.

En definitiva, que a imperiosa necesidade de protección do noso litoral polos seus valores culturais, ambientais, paisaxísticos e económicos fronte a unhas inadecuadas políticas urbanísticas, obrigan ás administracións a non quedar impasibles  e a formular o Plan de Ordenación do Litoral de Galicia. Este plan trata de establecer un novo modelo territorial baseado fundamentalmente na división de todo o territorio afectado en zonas con distintos grados de protección e na identificación de elementos a protexer ou, no extremo oposto, a eliminar ou reordenar para integralos na paisaxe litoral. Así se prevén corredores ecolóxicos que discorren aproveitando cauces dos ríos e regatos. As proteccións establecidas se traducen en criterios e normas limitativos dos crecementos urbanísticos e que regulan os usos autorizables e os prohibidos nas distintas áreas protexidas, cun rango xeráriquico superior aos plans urbanísticos de competencia municipal, debendo éstos adaptarse ás determinacións do POL.

Esta depencencia xerárquica vai provocar numerosos conflictos e tensións na aplicación do nos planeamento urbanístico vixente así como na formulación de novos plans a partir da entrada en vigor do POL.

Por outra banda, o POL nacerá coxo por dous factores: a ausencia de Directrices de Ordenación do Territorio de Galicia aprobadas ántes da entrada en vigor do POL, e por outra os erros de interpretación da realidade física do territorio xunto coa indadecuada expresión gráfica e normativa empregada para representar o novo modelo territorial.

Outros motivos de rexeitamento do POL pola nosa banda, e motivo do seu previsible fracaso, son a falta de “xustificación económica” do espírito proteccionista do modelo proposto, e a carencia das necesarias previsións respecto dunha adecuada xestión que poida facer funcionar un modelo territorial baseado de xeito importante na xeración duns corredores que sirvan de conexión ecolóxica e funcional entre as distintas áreas e elementos definidos no propio plan.

Ademáis, é necesario manter ata a aprobación final do POL a suspensión de tramitación de novos planeamentos na franxa dos primeiros 500 metros dende a ribeira do mar.

Dada a trascendencia, importancia e necesidade do plan de ordenación do litoral, non debería aprobarse sen antes correxir as deficiencias que no mesmo se observan con carácter tanto xeral coma referidas ao noso concello de Gondomar, e sen mellorar a coordinación e participación administrativa no procedemento, todo o cal repercutirá, sen dúbida, nunha maior calidade e viabilidade do modelo territorial proposto, e no benestar e satisfacción das gondomareñas e dos gondomareños.

Executiva Local do PSdeG-PSOE Gondomar

Enlace completo ás alegacións:

Alegacións POL Gondomar.2010

INICIATIVA DO PSOE DE GONDOMAR RESPECTO DA SANIDADE

A EXECUTIVA LOCAL DO PSdeG-PSOE DE GONDOMAR, ao amparo do disposto na Lei 7/1985 de Bases de Réximen Local, no Real Decreto 2568/1986 polo que se aproba o Regulamento de Organización, Funcionamento e Réximen Xúridico das Entidades Locais, e na Lei 30/1992 de Réximen Xurídico das Administracións Públicas e do Procedemento Administrativo Común, baixo a protección xurídica da Constitución Española, presenta AO PLENO DO CONCELLO DE GONDOMAR a seguinte

I N I C I A T I V A

A Consellería de Sanidade da Xunta de Galicia, anunciou publicamente que, para financiar a posta en funcionamento do novo Hospital de Vigo, utilizarase o modelo concesional coa fórmula de pago por dispoñibilidade.

As concesións de obra para construír hospitais consisten en que unha empresa ou grupo de empresas privadas, principalmente construtoras, ás que tamén se unen os bancos e empresas de servizos, son as que levan a cabo a construción das novas infraestruturas sanitarias por encargo do Sistema Público de Saúde.

O custo da construción e do equipamento dos novos hospitais sufrágase desembolsando ás empresas construtoras unha cantidade ou canon. Se multiplicamos esa cantidade anual que pagará o SERGAS polos anos de duración da concesión (20 no proxecto de Hospital que se propón para Vigo), o resultado superará varias veces o valor de licitación das obras e os equipamentos dos novos hospitais (nalgúns casos chegou a ser ata catro veces superior: cos fondos empregados o SERGAS podería pagar catro hospitais das mesmas características).

Esta forma de colaboración pública-privada implica desembolsos económicos moi superiores para o noso sistema sanitario que os modelos exclusivamente públicos como os empregados ata agora no resto de Galicia. Isto é debido ao seguinte:

1 – As empresas adxudicatarias acoden a importantes endebedamentos. Os intereses que han  pagar estas empresas a Bancos e Caixas son moi superiores aos que pagaría a Administración Pública. As empresas imputan este custo ao canon, o que supón un custo moito máis caro que o que suporía unha operación crediticia realizada pola propia Xunta, a través de mecanismos xa establecidos como é a Sociedade Pública de Investimentos.

2 – As empresas teñen como lexítimo obxectivo conseguir a maior rendabilidade posible tanto  para os seus directivos como para os seus accionistas, sendo o SERGAS quen  acaba garantindo eses beneficios con cargos aos seus fondos.

3 – Os custos das renegociacións dos novos contratos, no caso de creba económica dalgunha das empresas concesionarias. Deste fenómeno o Reino Unido ten numerosos exemplos (ata 14) e tamén se observou no hospital de Alzira en Valencia.

Outros inconvenientes deste modelo son a hipoteca da capacidade de investimento e a redución dos orzamentos sanitarios dos Servizos de Saúde durante décadas, a limitación da capacidade dos hospitais para adaptarse ás melloras e innovacións tecnolóxicas, o empeoramento da calidade asistencial e a seguridade dos doentes así coma o empeoramento das condicións laborais dos traballadores

Por todo o anterior, rexeitamos radicalmente os argumentos esgrimidos en defensa de modelo algún de colaboración pública-privada como a axilidade nos prazos de posta en funcionamento dos novos hospitais ou problemas orzamentarios que ademais de ser falsos, non demostran nada máis que a propia ineficiencia dos actuais responsables da Xunta de Galicia e a pouca confianza que teñen en se mesmos.

Por todo iso, o A Agrupación Socialista propón ao Pleno a adopción dos seguintes ACORDOS:

• Instar á Xunta de Galicia a manter os Plans Funcionais e os Proxectos Arquitectónicos do novo Complexo Hospitalario de Vigo existente antes dás eleccións autonómicas do 1 de Marzo de 2009, que foron elaborados coa colaboración e participación activa de todos os profesionais sanitarios dos Complexos Hospitalarios, cas dotacións de camas, equipamentos tecnolóxicos e servizos de referencia.

• Instar á Xunta de Galicia a existencia dunha porta única para todas as urxencias que garanta a mesma calidade asistencial a todas as persoas e que acabe coa desigualdade que soportan actualmente na Área de Vigo os cidadáns de Coia, Val Miñor, Cangas e Moaña.

• Instar á Xunta de Galicia que o financiamento destes novos Complexos Hospitalarios sexa con capital público e con todos os seus servizos tamén con  xestión totalmente pública, a través da Sociedade Pública de Investimentos, e non de financiamento privado.

• Instar á Xunta de Galicia que rexeite rotunda e definitivamente a inclusión da participación privada no financiamento dos novos hospitais.

Gondomar, a 18 de Marzo de 2010.

O Secretario Xeral do PSdeG-PSOE de Gondomar.

Juan Francisco Ferreira González.

Unha de humor: Crónicas tripartitas.

¡¡ Toc, toc,….!!, día 25 de febreiro, nove da mañá, dá comenzo o Pleno do Concello de Gondomar… Debatidos os puntos da Orde do Día chegamos ó debate das mocións presentadas. Lectura dunha delas: “LIMPEZA DO RIO ZAMÁNS” presentada e defendida polo voceiro do BNG. “O alcalde”, en voz baixiña e con sixilo, dalle a palabra “ós seus colegas membros do Goberno”, e con voz ronca, forte e manifesta valentía e poder toma a palabra o concelleiro de Medio Ambiente Sr. Cabaleiro de Honor e dí: “nós, o goberno, imos votar a favor desta moción porque entendemos que o río debe estar limpo, bla, bla, bla,…”, ¡¡carallo!!, unha moción que vai saír adiante por unanimidade e a prol de Gondomar, -pensamos-,pero de súpeto <<cataplof>>, retoma a palabra o super concelleiro de Gobernación Manolito Núñez, !!sorpresa, sorpresisísima!! corrixe taxántemente ó seu homólogo e compañeiro de batallas como un “verdadeiro cabaleiro” e dí: “o Goberno municipal vai votar en contra desta moción, xa que o concello non e quen de meterse nas competencias da Xunta de Galicia, e iso non é cousa nosa, polo que o goberno di “non” á moción presentada e coma se fose “palabra de Deus”, o Sr. Cabaleiro agochou o rabo entre as pernas e baixo a rigurosidade do poder político (PP) dos seus mandamais, replegou velas e “onde dixo digo, dixo Manolito…” e onde ían votar “non” resultou votar “sí“, ó que Cabaleiro tiña que saber como “bo pescador” que é, e qué “onde vai patrón non manda… mariñeiro”.

Inclemencias do directo señores, coma se de John Cobra se tratase…

Esto foi todo dende o Salón de Plenos, para a próxima sesión, voltaremos con máis tripartitadas….

A Executiva Municipal do PSdeG-PSOE de Gondomar.

Moción do PSdeG-PSOE sobor da Lei de Augas de Galicia

O Goberno da Xunta de Galicia acaba de facer público o anteproxecto de Lei de Augas de Galicia que pretende trasladar ao Parlamento de Galicia antes de que remate o presente ano. Este anteproxecto de Lei non é, a xuízo dos socialistas, unha auténtica Lei de Augas, por outra banda necesaria no noso país.
Este anteproxecto é máis ben unha excusa para duplicar ou triplicar o recibo da auga que os concellos teñen que cobrar aos usuarios, chegando os prezos, nalgúns tramos, a igualarse co prezo da auga que sae dunha desaladora (0,45 euros/m3).
O Goberno da Xunta de Galicia con esta Lei non está regulando realmente a política da auga en Galicia, non ordena os usos da auga na súa totalidade, esquécese das traídas de auga que milleiros de cidadáns teñen no rural e que sosteñen eles mesmos, esquécese da diversa e confusa fiscalidade que existe hoxe sobre a auga en Galicia donde se pagan taxas, tributos, canons, etc. ós concellos, á Xunta e ás Confederacións Hidrográficas.
Non dialogaron con outras administracións para buscar unha ordenación da auga que permita, unha fiscalidade progresiva si, pero tamén equitativa, donde todos os e as cidadás teñan acceso á auga e paguen o mesmo en todos os territorios.

Aínda que se afirma que é para dar cumprimento á Directiva Marco da Auga non se contemplan aspectos fundamentais da mesma que deberán quedar recollidos neste texto de lei, como: A utilización sostible dos recursos hídricos, a necesidade de protección e mellora dos sistemas acuáticos, a protección do recurso auga, ou a prevención e redución da contaminación e en xeral a protección do medio ambiente.
Tampouco se regulan, só se fan leves referencias, ás situacións de enchentas (inundacións) ou secas nin á necesidade de levar a cabo tarefas preventivas nestes campos, sobor de todo tendo en conta as graves inundacións que partes do territorio galego teñen sufrido anos atrás así como a aparición de casos puntuais de seca que se teñen dado e eran impensables anos atrás en Galicia. Non se fai referencia ás zonas inundables nin ás zonas protexidas. Falta, tamén, unha regulación relativa ao rego, onde se garanta unha xestión eficiente e sostible do mesmo.
En definitiva, este proxecto de Lei de Augas non responde ás necesidades reais do país e pretende subirlle a auga aos cidadáns e ás cidadás pero, que sexan os alcaldes e alcaldesas os que fagan a recaudación para entregarlle logo á Xunta de Galicia.

ACORDOS

Retirar o actual anteproxecto de Lei de Augas de Galicia e elaborar un novo proxecto de Lei de Augas de Galicia, que será sometido a consulta pública diante dos usuarios, concellos, e organizacións sociais afectadas polo desenvolvimento da mesma. Este novo proxecto deberá contar, alomenos, cos seguintes elementos:
1. O estrito cumprimento da Directiva Marco da Auga e a inclusión no texto da Lei de todos os preceptos incluídos na mesma.

2. Unha fiscalidade progresiva para auga en Galicia, que chegue a todos os cidadáns e as cidadás e a todos os territorios de igual xeito, para o que será necesario que exista un acordo de cooperación institucional cos concellos e coa administración do Estado.
3. Unha regulación e ordenación dos usos da auga que recolla todas as casuísticas do territorio galego e do acceso á auga, de xeito que se garanta que a auga sexa un servicio universal para o conxunto das galegas e dos galegos.

Créditos da fotografía: http://www.flickr.com/photos/teresalaloba/3569146663/in/set-72157617698450776/

MOCIÓN sobre a ampriación do prazo de pagamento do IBI 2009

A Executiva Local do PSdeG-PSOE de Gondomar, ao amparo do disposto na Lei 7/1985 de Bases de Réxime Local, no Real Decreto 2568/1986 polo que se aproba o Regulamento de Organización, Funcionamento e Réximen Xúridico das Entidades Locais, e na Lei 30/1992 de Réxime Xurídico das Administracións Públicas e do Procedemento Administrativo Común, baixo a protección xurídica da Constitución Española, presenta a seguinte

INICIATIVA

Exposición de motivos:

O imposto de Bens Inmobles de Natureza Urbana, Rústica e de Características Especiais do exercizo 2009 púxose ao cobro, no seu periodo de recadación voluntaria, por parte do ORAL-Deputación de Pontevedra, Organismo encargado da súa xestión e recadación por delegación deste Concello, do 15 de Xullo ao 30 de Setembro.

A notificación do cobro fíxose, coma é habitual, mediante o envío de notificacións individualizadas aos contribuíntes, remitidas por correo ordinario ao seu enderezo fiscal, así como mediante a publicación do edicto de cobro nas dependenzas do ORAL na súa oficina de recadación de Ramallosa-Nigrán. No anuncio informábase aos contribuíntes que de non ter recibido o instrumento de pagamento á data de primeiro de setembro, deberían obter un dupricado persoándose na citada oficina.

Nembargantes, de forma excepcional, aconteceu que este ano a recepción dos recibos imprescindibles para poder facer o pagamento ou ben non se produxo ou se recibiron a escasos 10 días do remate do periodo voluntario. O envío dos recibos fíxose de forma tardía, dando lugar a que os contribuíntes non os recibiran ou os recibiran con escaso tempo para facelo efectivo, lonxe do mínimo de dous meses fixado pola normativa tributaria, pasada incluso a data sinalada polo Organismo encargado da recadación para obter o dupricado.

En consecuencia, a maioría dos contribuíntes terán que facer efectivo o pagamento cun recargo do 5 % na súa cuota, o que debemos considerar inxusto e inxustifcado. A situación agrávase pola necesidade de desprazamento ata outro Concello, que non Gondomar, para poder obter dupricados dos recibos ou novos instrumentos de pago co recargo apricado, a mais de ter que facelo en horario de mañá, horario de traballo para a maioría dos contribuíntes.

Dado o carácter excepcional do acontecido este ano, a fin de evitar gastos, recargos e inconvintes inxustificados aos nosos veciños, e tal e como aconteceu noutros Concellos en casos similares, é necesario aprobar por parte desta Corporación unha ampriación no periodo de pagamento voluntario do Imposto de Bens Inmobles de Natureza Urbana, Rústica e de Características Especiais no exercizo tributario 2009.

Por todo o exposto anteriormente,

A Executiva Local do PSdeG-PSOE de Gondomar presenta ante o Goberno Municipal, para o seu debate e aprobación na próxima Sesión Plenaria da Corporación, as seguintes

PROPOSTAS

1. 1. Decretar por parte da Corporación Municipal a ampriación no período cobratorio voluntario do IBI do exercizo 2009 ata o 20 de Novembro de 2009 ou, no seu caso, por prazo de un mes a contar dende a data de adopción do presente acordo.

1. 2. Comunicar este acordo ao ORAL-Deputación de Pontevedra, Organismo encargado da xestión tributaria e recadación deste imposto en virtude de Convenio de Delegación, a fin de que adopte as medidas necesarias para dar cumprimento ao mesmo, e proceda, no seu caso á devolución de oficio dos recargos cobrados indebidamente trala ampriación do prazo ou ben decrete a súa compensación no recibo a liquidar no próximo exercizo.

E para que así conste asinamos, presentamos e propomos a presente iniciativa en Gondomar,  a 13 de outubro de 2009.

O Secretario de Política Municipal e Facenda Local

PSdeG-PSOE Agrupación Local de Gondomar.

A executiva socialista de urxe ao goberno a limpeza das marquesinas

Aínda que a necesidade de actuación é case xeneralizada, hai casos que se presentan como urxentísimos, como son os de Vilaza (Barreiro) e Borreiros.
No caso de Vilaza, tantos os nenos como os seus pais non lle atreven nin a achegarse a marquesiña, debido ao estado de abandono que presenta, con suciedad, cristais rotos e maleza que fai imposible acceder a ela, co perigo de salubridade e hixiene  que isto supón.
Outro caso constatado persoalmente por membros da executiva socialista é o de Borreiros  onde a marquesiña está tan preto dos contenedores que as bolsas de lixo acaban literalmente dentro dela.
O PSOE de Gondomar insta ao goberno municipal do Partido Popular máxima celeridade nos traballos de adecentamiento e limpeza, tendo en conta que é a saúde e integridade física dos nosos fillos e fillas o que está en xogo, ademais , en breve chegarán as chuvias e os escolares, na maioría dos casos, non terán un lugar digno onde resgardarse.

MOCIÓN sobre a gratuidade dos libros de texto

A Executiva Local do PSdeG-PSOE de Gondomar, ó amparo do disposto na Lei 7/1985 de Bases de Réximen Local, e no Real Decreto 2568/1986 polo que se aproba o Regulamento de Organización, Funcionamento e Réximen Xúridico das Entidades Locais, e na Lei 30/1992 de Réximen Xurídico das Administracións Pública e do Procedemento Administrativo Común, baixo a protección xurídica da Constitución Española, presenta a seguinte

INICIATIVA:

Exposición de motivos:

A quince días do comezo do curso as familias seguen esperando que a Xunta de Galicia se volva atrás na decisión de acabar coa gratuidade dos libros de texto. Esta medida, totalmente inxusta e discriminatoria nun sistema educativo gratuito, foi tomada de xeito apresurada, tarde e a destempo (cando o curso xa rematara), sen ter en conta a opinión dos sectores implicados (sen facer enquisa ningunha para coñecer a opinión das nais e dos pais), especialmente as ANPAS e as súas federacións.

Este curso vai comezar con problemas: os centros escolares non van poder contar con libros de texto ata, polo menos, o mes de outubro. A estas alturas moitas familias non reservaron os libros nas librerías á espera dunha solución que evite ter que adiantar o diñeiro, no mellor dos casos os beneficiarios das axudas segundo a súa renda que lles permitirá o dereito, se cabe, á devolución posterior dos cartos a longo prazo, agravando aínda máis a situación complicada a nivel económico e laboral que veñen a padecer xa estas familias -parece que a crise para o Sr. Feijoó só existe nos seus despachos e non nas nosas casas-.

Rematar coa gratuidade dos libros deste xeito tan arbitrario e repentino, deixou ós Concellos sen posibilidade reaccionar e promover axudas para libros e material escolar tal e como facían antes de seren os libros de balde polo anterior goberno da Xunta. E a maiores hai que ter en conta que, ademais do que gastan as familias nos textos, teñen que adquirir outro tipo de material escolar, e todo isto para as familias galegas en xeral, e un particular para as Gondomareñas supón un gasto insoportable no comezo do curso que entra.

A isto hai que engadirlle outras medidas anunciadas anunciadas recentemente nos medios de comunicación sobre a segregación do alumnado polo idioma e a derogación do Decreto do Galego. Medidas que está tomando o Conselleiro de Educación e que non son boas para un sistema educativo que precisa a tranquilidade que reclamaba o PP cando estaba na oposición e que agora, en dous meses, pon patas arriba improvisando continuamente.

O sistema educativo precisa tranquilidade e estabilidade, e “meter con calzador” en tres meses un programa de catro anos (se é que existía programa en ese senso) só vai prexudicar a vida das familias e dos centros educativos galegos. Cómpre, polo tanto, deixar sen efecto este curso o pago dos libros de texto e volver ao sistema de  gratuidade que existía, favorecendo a economía familiar en tempos de crise, deixándolle tempo ós concellos para que consignen nos seus orzamentos do 2010 as partidas necesarias para equilibrar esta medida discriminatoria e facer que o ensino obrigatorio sexa realmente gratuito.

Por todo o exposto anteriormente,

A Executiva Local do PSdeG-PSOE de Gondomar presenta ante o Goberno Municipal, para o seu debate e aprobación na próxima Sesión Plenaria da Corporación, as seguintes

P R O P O S T A S

1. 1. Instar ó Goberno da Xunta de Galicia para que volte atrás na decisión de acabar coa gratuidade dos libros de texto, por considerar esta medida inxusta e discriminatoria nun sistema educativo gratuito como o noso, e de non ser así.

1. 2. Consignar unha Partida Económica no Orzamento Municipal deste ano 2009, e poder así, ofrecerlles as familias Gondomareñas a axuda económica necesaria para a adquisición do material escolar do curso académico 2009-2010.

Gondomar a, 18 de agosto de 2009.

O Secretario Xeral do PSdeG-PSOE de Gondomar.